Má tá tú ag maireachtáil le do thuismitheoirí/chaomhnóirí dlíthiúla, measúnófar thú mar mhac léinn cleithiúnach. Cuirfear d’ioncam agus ioncam do thuismitheoirí/chaomhnóirí dlíthiúla san áireamh.

Má tá tú ag maireachtáil go neamhspleách ar do thuismitheoirí/chaomhnóirí dlíthiúla, seans go bhféadfaí tú a mheasúnú mar mhac léinn neamhspleách. Cuirfear d’ioncam agus ioncam do chéile / chomhchónaitheora san áireamh.

Má tá tú ag smaoineamh ar d’fhostaíocht reatha a fhágáil chun filleadh ar staidéar, féadfar d’iarratas a mheasúnú ag tagairt d’athrú ar chúinsí.

Ní féidir le SUSI athrú ar chúinsí a chur i bhfeidhm go dtí go dtarlóidh sé. Murar fhág tú d’fhostaíocht ag an am a rinne tú d’iarratas chuig SUSI, ba cheart duit Athbhreithniú Inmheánach a iarraidh ar d’iarratas tar éis deireadh a chur le d’fhostaíocht.

Más spéis leat staidéar a dhéanamh ar bhonn páirtaimseartha, tá deontais ranníocaíochta táillí ar fáil do mhic léinn incháilithe le haghaidh 62 cúrsa fochéime páirtaimseartha ceadaithe sa Stát.

Féach ar ár leathanach tiomnaithe cúrsaí páirtaimseartha le haghaidh sonraí iomlána na gcritéar incháilitheachta agus an phróisis iarratais.

Le bheith incháilithe do mhaoiniú deontais, ní mór duit a bheith ag dul chun cinn i d’oideachas agus ag freastal ar chúrsa ceadaithe i gcoláiste ceadaithe.

Más rud é gur fhreastail tú ar chúrsa roimhe seo ach nár chríochnaigh tú é agus má tá tú ag filleadh ar staidéar tar éis sos trí bliana, b’fhéidir go measfar thú mar mhac léinn dara seans.

Má tá iarratas déanta agat ar Liúntas chun Filleadh ar an Oideachas (LFO) nó ar íocaíocht Scéim Deiseanna Oiliúna Gairmoideachais (SDOG), ní bheidh tú incháilithe le haghaidh deontas cothabhála ó SUSI. D’fhéadfá a bheith fós i dteideal deontas táillí.