Meabhrán Tuisceana
An Meabhrán Tuisceana idir an Phríomh-Oifig Staidrimh agus Tacaíocht Chomhchoiteann do Mhic Léinn in Éirinn (TCMLÉ) maidir le cúrsaí teicniúla, malartú sonraí, slándáil, cáilíocht agus minicíocht.
Clár Ábhair
Aistriú sonraí, slándáil agus stóráil sonraí
Fad agus Athbhreithniú ar an Meabhrán Tuisceana
Déantar an Meabhrán Tuisceana seo ar an 23ú Lúnasa 2024 idir an Phríomh-Oifig Staidrimh (an POS) agus Tacaíocht Chomhchoiteann do Mhic Léinn in Éirinn (TCMLÉ).
Liosta na nod
RASR Rialachas agus Anailís Sonraí Riaracháin (ag an bPríomh-Oifig Staidrimh)
POS an Phríomh-Oifig Staidrimh
MT Meabhrán Tuisceana
CGI Comhghrúpa Idirchaidrimh
PACS Prótacal Aistrithe Comhad Slán
TCMLÉ Tacaíocht Chomhchoiteann do Mhic Léinn in Éirinn
Bunú na bPáirtithe
Bunaíodh an Phríomh-Oifig Staidrimh i 1949 agus rinneadh comhlacht reachtúil de i 1994, faoin Acht Staidrimh, 1993.
Bunaíodh Tacaíocht Chomhchoiteann do Mhic Léinn in Éirinn i 2012. Is aonad gnó de chuid BOO Chathair Bhaile Átha Cliath é TCMLÉ agus riarann sé maoiniú de réir na reachtaíochta atá leagtha amach san Acht um Thacaíocht do Mhic Léinn 2011 agus sa Scéim Deontais Mac Léinn agus Rialacháin Thacaíochta do Mhic Léinn.
Ról na bPáirtithe
Tá feidhmeanna na Príomh-Oifige Staidrimh leagtha amach san Acht Staidrimh, 1993. Deir Alt 10 go háirithe is iad feidhmeanna na hOifige faisnéis a bhaineann le gníomhaíochtaí agus coinníollacha eacnamaíocha, sóisialta agus ginearálta sa Stát a bhailiú, a thiomsú, a bhaint agus a scaipeadh chun críocha staidrimh. Tá an t-údarás ag an Oifig staidreamh oifigiúil arna thiomsú ag údaráis phoiblí a chomhordú chun a áirithiú, go háirithe, go gcloítear le caighdeáin staidrimh agus go n-úsáidtear aicmithe cuí agus tá an t-údarás aici measúnú a dhéanamh ar acmhainneacht staidrimh na dtaifead atá á gcoimeád ag údaráis phoiblí agus a chinntiú go mbaintear amach an poitéinseal. Ina theannta sin, tá oibleagáidí dlíthiúla ar an bPríomh-Oifig Staidrimh maidir le staidreamh Eorpach a fhorbairt, a tháirgeadh agus a scaipeadh faoi Rialachán (CE) Uimh. 223/2009 an 11ú Márta 2009.
Is í Tacaíocht Chomhchoiteann do Mhic Léinn in Éirinn (TCMLÉ) údarás dámhachtana náisiúnta na hÉireann le haghaidh deontas breisoideachais agus ardoideachais. Cuireann TCMLÉ maoiniú ar fáil do mhic léinn incháilithe ar chúrsaí lánaimseartha ceadaithe ag leibhéil cúrsa iar-Ardteistiméireachta, fochéime agus iarchéime in Éirinn agus i gcásanna áirithe, do mhic léinn atá ag staidéar sa RA nó san AE. Is féidir le gach cineál mac léinn, ó lucht fágála scoile go mic léinn lánfhásta atá ag filleadh ar an oideachas cur isteach ar mhaoiniú.
Comhthéacs agus cúlra
Déileálfar le sonraí a chuirtear ar fáil don Phríomh-Oifig Staidrimh faoin gcomhaontú seo mar shonraí atá faoi rún daingean, agus úsáidfear iad chun críocha staidrimh amháin. Déanfar é sin de réir an Achta Staidrimh, 1993, go háirithe alt 30 a dhéileálann le rochtain ar thaifid na nÚdarás Poiblí agus úsáid a bhaint as chun críocha staidrimh.
Aidhm an Mheabhráin Tuisceana
Is é cuspóir an MT seo ná soiléiriú a dhéanamh ar róil agus ar fhreagrachtaí an Phríomh-Oifig Staidrimh agus ar na réimsí comhoibrithe idir an Phríomh-Oifig Staidrimh agus TCMLÉ maidir le sonraí TCMLÉ a chomhroinnt leis an bPríomh-Oifig Staidrimh.
Is MT é an comhaontú seo agus níl sé beartaithe go gcruthódh sé oibleagáidí ceangailteacha nó dlíthiúla ar cheachtar Páirtí. Déantar an MT ar an tuiscint go bhfuil sé faoi réir na reachtaíochta ábhartha a rialaíonn gach Páirtí.
Leagann an MT seo amach freisin comhthuiscint na bpáirtithe maidir le saincheisteanna cosanta sonraí a d’fhéadfadh teacht chun cinn agus róil a bhaineann le tiomsú, aistriú agus úsáid na sonraí seo. Tá próiseáil sonraí pearsanta na ndaoine is ábhar do na sonraí á rialú ag an Acht Staidrimh, 1993, na hAchtanna um Chosaint Sonraí 1988-2018 agus an Rialachán Ginearálta maidir le Cosaint Sonraí.
Freagrachtaí gach Páirtí
Is é TCMLÉ an rialaitheoir sonraí le haghaidh sonraí pearsanta. Nuair a aistrítear na sonraí chuig an bPríomh-Oifig Staidrimh, is í an Phríomh-Oifig Staidrimh an rialaitheoir sonraí. Dá bharr sin tá sé de fhreagracht ar an bPríomh-Oifig Staidrimh aon sárú sonraí a bhaineann leis na sonraí a thuairisciú, nuair a bheidh siad ina seilbh.
I gcás sárú a bhaineann le sonraí cuirfidh an Phríomh-Oifig Staidrimh an tOifigeach Cosanta Sonraí TCMLÉ ar an eolas faoi agus cuirfidh sí TCMLÉ ar an eolas faoin sárú tríd an CGI. Tabharfar an fógra seo laistigh de 24 uair an chloig. Ina theannta sin, déanfaidh an Phríomh-Oifig Staidrimh tagairt dá nósanna imeachta sáraithe sonraí féin agus féadfaidh siad an sárú a thuairisciú don Choimisiún um Chosaint Sonraí de réir mar is cuí. Ní bheidh TCMLÉ freagrach as aon chaillteanas, damáiste nó díobháil a dhéantar mar thoradh ar a leithéid de shárú.
I gcás sárú a bhaineann le sonraí cuirfidh an Phríomh-Oifig Staidrimh in iúl do TCMLÉ tríd an CGI, roimh ré, maidir le haon chinneadh ráiteas poiblí a eisiúint maidir leis an sárú. Ar an gcaoi chéanna, cuirfidh TCMLÉ an Phríomh-Oifig Staidrimh ar an eolas tríd an CGI, roimh ré, faoi aon chinneadh ráiteas poiblí a eisiúint maidir leis an sárú.
Ní sholáthróidh TCMLÉ sonraí breise ná tacaíocht oibriúcháin maidir le fógra a thabhairt do dhaoine is ábhar do na sonraí i gcás sárú a bhaineann le sonraí an Phríomh-Oifig Staidrimh.
Cúlra dlíthiúil
Déanfar na sonraí a aistriú agus a phróiseáil i gcomhréir leis an Acht Staidrimh, 1993, leis na hAchtanna um Chosaint Sonraí 1988-2018, leis an Rialachán Ginearálta maidir le Cosaint Sonraí, le dlí an AE agus i gcomhréir le Cód Cleachtais na Príomh-Oifige Staidrimh, go háirithe a prótacal maidir le meaitseáil sonraí i gcás ina dtagann tacar sonraí amháin nó níos mó ó lasmuigh den Phríomh-Oifig Staidrimh.
Clúdaítear aistriú agus próiseáil na sonraí, i measc nithe eile, leis na forálacha seo a leanas:
- Alt 13 den Acht Staidrimh, 1993, maidir le neamhspleáchas staidrimh Ard-Stiúrthóir na Príomh-Oifige Staidrimh;
- Ailt 30 agus 31 den Acht Staidrimh, 1993 maidir le húsáid thaifid na n-údarás poiblí chun críocha staidrimh;
- Ailt 32 agus 33 den Acht Staidrimh, 1993, maidir le cosaint faisnéise;
- Alt 24(2) den Acht Staidrimh, 1993 (arna leasú le hAlt 178 den Acht um Chosaint Sonraí), maidir le faisnéis a sholáthar don Phríomh-Oifig Staidrimh;
- Airteagal 6(1)(c) den Rialachán Ginearálta maidir le Cosaint Sonraí;
- Airteagal 6(1)(e) den Rialachán Ginearálta maidir le Cosaint Sonraí;
- Airteagal 89 den Rialachán Ginearálta maidir le Cosaint Sonraí;
- Alt 42 den Acht um Chosaint Sonraí 2018;
- Airteagal (9)(2)(j) den Rialachán Ginearálta maidir le Cosaint Sonraí;
- Alt 54(c) den Acht um Chosaint Sonraí 2018.
Aistriú sonraí, slándáil agus stóráil sonraí
Tá seachadadh sceidealta le bheith faighte ag an bPríomh-Oifig Staidrimh i mí Lúnasa gach bliain maidir le faisnéis a bhailíonn TCMLÉ faoi láthair chun críocha oibriúcháin. Déanfar na comhaid a chriptiú ar dtús agus ansin iad a lódáil chuig freastalaí Prótacal Aistrithe Comhad Slán (PACS) atá cosanta ag pasfhocal arna chothabháil ag an bPríomh-Oifig Staidrimh.
Coinneoidh an Phríomh-Oifig Staidrimh sonraí, iad a stóráil go slán agus a phróiseáil de réir Beartais Sonraí an Phríomh-Oifig Staidrimh agus an RASR.
Cuirfidh TCMLÉ na sonraí ar fáil don Phríomh-Oifig Staidrimh i bhformáid chomhaontaithe. Soláthróidh TCMLÉ faisnéis maidir le formáidí sonraí agus minicíocht seachadta maidir le sceideal na gcomhad sonraí. De réir bheartais an Phríomh-Oifig Staidrimh maidir le rialú sonraí, ní dhéanfaidh an Phríomh-Oifig Staidrimh na sonraí seo a chóipeáil ar mheáin inbhainte (lena n-áirítear ríomhairí glúine) mura bhfuil forálacha slándála cuí i bhfeidhm (m.sh. criptiú agus rochtain phasfhocal) agus go bhfuil riachtanas gnó comhaontaithe ann é sin a dhéanamh, agus sa chás sin cuirfidh an Phríomh-Oifig Staidrimh TCMLÉ ar an eolas faoin riachtanas sin tríd an CGI.
Comhghrúpa Idirchaidrimh
Tionólfar Comhghrúpa Idirchaidrimh (CGI) TCMLÉ agus an Phríomh-Oifig Staidrimh, de réir Chreat caighdeánach Rialachais Sonraí na Príomh-Oifige Staidrimh. Déanfaidh an CGI maoirsiú ar chomhroinnt na sonraí mar a comhaontaíodh idir na páirtithe agus a bhfuil achoimre orthu sa MT seo.
Comhaontófar na Téarmaí Tagartha (TT) don CGI idir Tacaíocht Chomhchoiteann do Mhic Léinn in Éirinn agus an Phríomh-Oifig Staidrimh. Clúdóidh na TT, i measc rudaí eile, comhaltas den CGI, minicíocht na gcruinnithe agus raon feidhme an CGI. Ní mór don dá pháirtí athruithe ar na TT a chomhaontú i gcomhpháirt.
Fad agus Athbhreithniú ar an Meabhrán Tuisceana
Foilseofar an MT seo ar shuíomh gréasáin an Phríomh-Oifig Staidrimh (www.cso.ie) agus ar shuíomh gréasáin TCMLÉ.
Fanfaidh an MT seo i bhfeidhm go dtí go gcuirfear ceann nua isteach nó go ndéanfaidh an Phríomh-Oifig Staidrimh nó TCMLÉ é a chúlghairm. Ag brath ar imeachtaí, féadfar an MT seo a leasú, faoi réir chomhaontú frithpháirteach TCMLÉ agus an Phríomh-Oifig Staidrimh.
Déanfaidh TCMLÉ agus an Phríomh-Oifig Staidrimh athbhreithniú ar an MT seo gach dhá bhliain. Ní dhéanfar aon athruithe ar an MT ach amháin le comhaontú frithpháirteach an TCMLÉ agus an Phríomh-Oifig Staidrimh.
Sínithe
Jennifer Banim
Ard-Stiúrthóir
An Phríomh-Oifig Staidrimh
Dáta: 19ú Meán Fómhair 2024
Sínithe
Philip Connolly
Stiúrthóir Seirbhísí
Tacaíocht Chomhchoiteann do Mhic Léinn in Éirinn
Dáta: 28ú Lúnasa 2024